強颱風「山竹」破壞力驚人，家住粉嶺村屋嘅吳岱融同鍾淑慧屋企都遭殃，除咗泊車嘅棚架冧咗整花3部車，屋企玻璃又爆咗，搞到一地玻璃碎，最慘仲要係屋企停埋電。

鍾淑慧同《蘋果》話:「我哋喺屋企三樓望落去見到個架已經郁吓郁吓，吳生見到死都話要出去搞，因為見到一邊已經拍打緊部黃色車，已經知一定吹走，忍唔住衝出去睇吓點搞，跟住行出去已經見到個架插住另一部車車軚同條罅，好好彩隔離屋見到又幫手，諗住一齊掹返出嚟，點知個風一吹，成個頂連環吹走咗，屋企玻璃又畀啲雜物整爛咗後花園個頂，好多玻璃碎又唔敢清理，間屋入晒水，最慘係停晒電，聽聞要等10號風球落咗波先至有人可以維修。同埋手提電話又就快冇電，得番半格。」

鍾淑慧話屋企3部車都花晒，老公怕個架會吹去第度整到人，所以又用沙包壓住，出出入入搞到成身濕晒。問屋企有冇食物？鍾淑慧話自己有預備食物，但雪櫃冇電，希望停電唔好停咁耐，如果唔係啲食物會變壞。冇幾耐之後，鍾淑慧屋企門口條路仲因為冧樹封咗，令鍾淑慧大感無奈。

精選娛聞，喺晒《娛果》
http://fb.com/appledailyent