當年今日
關於我們

【有手尾跟】提議按金當租金 陳展鵬稱業主冇覆:以為搞掂咗!

蘋果日報 2018/06/12 20:21

冷氣煤氣陳展鵬陳媽媽

跳fuse,業主唔理;煤氣有問題,業主拖;到冷氣有問題喇,終於……
「個冷氣唔掂,咁我梗係同佢講要換。我仲要……嗰陣時我唔喺香港,我記得。所以嗰次言語呀閒談呀煤氣呀同埋冷氣機嘅時候,大家係有衝撞(言語上),我話Sorry喇,同你傾唔到,我要搵我嘅助手同你接洽,所以之後每一次嘅對話好多時都有照片啦,有WhatsApp。
「同埋有一樣嘢我想澄清番,租嗰度,即一開始settle件事嘅時候,我哋話,喂,會唔會好嚟好去呀?我哋依家只係要搬嘅啫,冇其他嘢嘅。如果你覺得要履行晒合約所有嘅嘢,例如租呀,冇問題,你做足所有手續,大家咪一齊去做嗰件事囉。我交咗但你唔係嗰件事,咁咪出事囉。最後你揀咗:『你喜歡啦!』咁我哋覺得,咁係咪即係OK呀?再寫多段(WhatsApp)畀佢,話我哋將按金變成租金,咁OK嗎?咁佢再冇覆,咁我哋就以為settle咗件事,就係咁之嘛。
「但依家又變咗係冇交2019年嘅租啦,個地板又壞啦,嗰個地板嗰啲照片同片段,其實係我發過去,我仲有好多條呢啲片。
「個地板係不斷有拱起嘅問題,條片已經畀咗媒體,你哋睇吓係我整爛咗佢,定係佢自己因為天氣潮濕而拱起。」
陳展鵬續道:「之前都講咗,因為媽咪俾啲地板拱起整到,都真係好嚴重。媽咪都唔想,同埋都冇能力同佢(業主)聯絡,所以交畀我,而我又真係成日唔喺香港,所以我交咗畀助手去處理,我覺得其實係好小嘅事,我知道我未必係做得最好,但唔需要去到一個咁嘅狀態。」
「雖然我係一個藝人,但係咪因為我係藝人就可以用咁嘅方法,唔用正途嘅方法,之前搞掂咗嘅,之後又變咗另一樣嘢,如果用正途嘅方法做,交一個月好兩個月好,都冇問題。因為我都唔係好識處理,所以都要交畀專業人士去處理,希望可以用正途嘅方法。」