今日係年初三「赤口」，何超儀相約老友林敏驄、詹瑞文跟《蘋果》讀者拜年，由詹sir負責彈結他合唱《財神到》，佢哋又趁「赤口」互問問題，經常搞搞震嘅阿驄趁機會撩交嗌，又玩「諧音」祝讀者「昂然進入狗年」！喺互問環節裡面，阿驄教brother點樣撇甩另一半去玩，詹sir教新春遇上大媽，如何講笑話o氹大家開心。

超儀要回答情人節一旦要喺詹sir同阿驄之間2揀1，會選擇跟誰過？超儀毫不猶豫就話揀詹sir，佢話：「揀阿驄我驚畀佢激x死！」唔知係咪超儀讚詹sir有個人之處，所以當詹sir被問超儀啲戲「屎唔屎」？有乜嘢角色一定演唔到？佢即刻話聞唔到呢陣味，又話超儀只係一個唔走常規嘅人，超儀就自爆喺好多年前，詹sir已經話佢有內在潛質，只係內在同外在都未配合到！之後到超儀問阿驄問題，本來問題係問阿驄唔再結婚係咪因為孤寒唔想派利是，抑或係怕咗女人？不過超儀心驚驚唔敢問，最後阿驄自己讀出問題，佢抵死話兩個講法都啱，遇到詹sir之後取向變咗，學懂隨「基」應變！

講到派利是，問到超儀每年新年要派多少利是？她即刻笑住話：「睇吓老豆喺唔喺醫院啦！如果喺屋企就派好少，如果喺醫院派好多，上上下下乜都唔做走衝晒出嚟，攞埋準備畀記者嗰啲都唔夠，真係停屍間嗰啲都出埋嚟架！」至於新年計劃，超儀話今年會舉行一個好特別嘅燈光演唱會，會呈現北極光嘅效果，但大家係睇佢唔到嘅！超儀講笑話：「我咁嘅身型唔方便睇，所以演唱會係鬆郁矇，入場有副眼鏡畀大家，戴咗之後會睇到啲燈光好似萬花筒效果。」

詹sir話又話嚟緊同超儀，會帶同一啲家庭去冰島，超儀話要教大家尋找快樂，點知畀阿驄窒：「你大把錢梗快樂喇！」超儀即刻反駁：「你就誤解喇！唔係乜嘢都講錢！」阿驄再攞詹sir開玩笑：「你睇吓詹瑞文冇錢會唔會即刻走？少個崩都唔得呀！」詹sir又玩埋一份話：「咁又講得啱喎！」

舊年喺紅館舉行作品演唱會嘅阿驄，佢話一直有入（紙），仲抵死笑話：「我堂堂正喺前面入嘅！」詹sir亦都話今年會搞舞台劇：「今次會有啲特別，以前舞台劇多數一個人，今次會兩個人。」阿驄又加把嘴：「兩個人做唔夠特別，如果你個舞台劇係冇人做先至特別。」好彩詹sir一樣轉數快，話不如成個劇就係得個「舞台」再加一對「屐」喇！

場地提供：銅鑼灣迷你酒店

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent