「五年前，我哋失敗咗。我哋失去親人，失去戰友，甚至連自我都失去埋。今日我哋有機會反敗為勝。你知你嘅任務。唔好犯錯，因冇得重來。大家小心，互相看守。這是為自己的存亡而戰。我們會贏。Whatever it takes，Good Luck。」

以上呢段，係美國隊長係《Avengers: Endgame》入面既對白，呢兩日係社交媒體瘋傳，套返今日香港嘅情況，實在幾搞笑，但又真係笑唔出。

我想講下歷史。香港開埠前，差不多200年前，只係個小島，全島得嗰萬幾人住。香港嘅「起源」，本身其實係一趟非理性嘅過程。

大家要知道，香港割讓咗、以至後來租借俾英國，係因為最初英軍佔領咗香港，然後同清廷講數，至有後來嘅《南京條約》。但成件事對英國而言，根本係「非理性」。

點解？因為當時，維多利亞女皇同英國外交大臣，根本唔想佔領中國任何地方，因為成本實在太高、又無著數，佢哋只係想清廷開放東部沿海四、五個口岸，方便進行合法貿易，即係揾食啫。

何解後來演變成佔領？因為當時有位仁兄——英方在華全權代表義律，認為單靠和平談判手段，唔足以迫令清政府開放口岸，佢判斷，必須要訴諸武力，佔領同割讓中國土地，例如台灣、海南、福州、廈門、舟山等地（香港連候選名單都上唔到）。

義律佔領同割讓香港，只係一個意外，出於同清延交涉唔成功，而香港島又水深港闊，適合駐海軍， 於是佢說服女皇放棄舟山、佔領香港島。到後來香港第一任總督砵甸乍取代義律，將香港作為軍事踏腳石，並發展至自由貿易港，全球鴉片貿易中心，都係大家熟知既歷史。

由嗰時開始，香港由一個漁村小島，發展成國際城市，至今行咗接近170幾年大運。

有位美國上咗市既Founder朋友S，曾經同我分享起佢既創業心法，亦正正係「非理性」。佢話：「考慮一件事當然需要理智，但當我一決定咗個件事，我就會自動變得不理智。」

朋友S認為，自己始終係生意人，會睇數字去分析。但要件事成功，執行就係要快同狠。狠是什麼意思？就係唔好look back諗對錯，決定咗就勇往直前。

我嘅解讀係，當你想創業，理性就係方向盤，可以幫你揾方向。但理性本身欠缺動力，有佢嘅極限。

相反任性同熱情，往往至係創業嘅最佳燃料。簡單嚟講，就係唔好諗咁多，做得幾多，盡做。

尹思哲
http://linkedin.com/in/wanszezit

investMAN
For People of Style & Substance
掌握理財智慧 感受生活品味
http://facebook.com/investMAN.hk