面色蒼白的梁女士向到訪記者訴說﹕「我兩年幾前證實患糖尿病，本來個病控制得幾好，點知早幾個月醫生發現我糖尿上眼，立即安排我前後做咗幾次手術，但對眼已經受損。」
梁女士表示，如今她上落樓梯看不清腳下的梯級，要用放大鏡才能閱讀報紙，另每日需注射胰島素控制糖尿病，防止病情進一步惡化。「我細佬兩年前因為糖尿病引致嚴重腎衰竭，過身嗰陣只得二十九歲。」梁女士黯然說。
病惡化 失工作
三十六歲的梁女士，先後任職船務文員及售貨員，奈何近年身患頑疾，難以工作。「除咗有糖尿病，我今年初生完BB之後，膊頭同啲關節痛得好犀利，照X光後發現我嘅膊頭骨壓住條筋，要長期接受物理治療；近排我成日覺得心口痛同氣喘，醫生排咗期幫我做詳細檢查。另外我腸胃好敏感，好容易肚疴，所以𠵱家我去醫院覆診，要分別睇骨科、內科、眼科同專科，每日要食好多種藥，周身唔舒服，真係好難搵工做。」
在社工協助下，梁女士近日獲房屋署體恤分配公屋單位，得以減輕屋租負擔及解決長遠居住問題。「間公屋好近醫院，方便我去覆診，另外租金比私人樓平得多。」