歐霸盃禮拜四晚嘅I組分組賽出現咗一個奇景，葡超球隊甘馬雷斯喺主場鬥奧地利球隊薩爾斯堡果陣，正選陣容嘅11位球員入面，無一個係歐洲球員，開創咗歐霸盃嘅一個紀錄。

上季喺葡超拎第4嘅甘馬雷斯，今場嘅11位正選球員全部嚟自南美洲同埋非洲，當中巴西更加係大戶，有四位代表，另外哥倫比亞球員亦都有兩個。即刻睇下甘馬雷斯嘅正選陣容係點嘅先。

門將：杜格拉斯連拿度（巴西）
後衛：域陀加西亞（委內瑞拉）、柏度漢歷基（巴西）、祖巴爾（巴西）、基斯蘭高蘭（科特迪瓦）
中場：華卡素（加納）、些利斯（哥倫比亞）、保羅靴達度（秘魯）
前鋒：史巴斯坦連干（哥倫比亞）、泰斯拿（烏拉圭）、拉菲爾戴亞斯（巴西）

根據資料，甘馬雷斯陣中都有13個歐洲球員㗎，仲清一色係嚟自葡萄牙，不過今場就全部無份踢正選咁解啫。另外，甘馬雷斯呢場波用嘅三位後備，第一位上陣嘅奇高就係葡萄牙人，不過之後上陣嘅希頓拉莫斯係嚟自佛得角，喺77分鐘入替嘅拉菲爾米蘭達就係巴西人。順便提下，呢場波兩隊最後係踢成1:1嘅。