幾日前，《路透社》報道話國資委喺深圳同近百間國企嘅代表訓話。要佢哋喺香港「發揮更積極的作用」，去幫手「止暴制亂」喎。

咁周末，傳統傳媒及網上評論界嘅800磅大猩猩，即陶傑同蕭若元都不約而同咁講番，49年後喺上海啲私人企業嘅遭遇。即係啲公司資產，最終點樣俾政府食咗，點令所有生活喺嗰度嘅人，生命被政府啲官員支配。你淨係睇吓喺香港食國企飯嘅朋友們，佢哋真係做乜政治嘢都要好小心就知。

咁喺香港可以點做？陶傑就好樂觀話因基本法保護產權，所以大陸政府會「像港交所企圖吞下倫敦交易所，開一個兩成的溢價」買晒香港啲大企業。我絕對冇佢咁樂觀。

中央已發現香港其中一個吹我哋唔漲嘅地方，就係我哋資本非常雄厚。多年來儲埋唔少，富可敵國。不過，我哋好多資產，都係因有生產力，所以先值錢。而要摧毀資產價值最易嘅方法，就係減低生產力。而要減生產力最易嘅方法，就係政府以「監管」之名推出條例。

香港泛民，其實好鍾意政府乜都擁控制權。佢哋同中央唯一嘅分歧係邊個操控政府機械去支配大家嘅生命。以前香港有個真心信馬克思主義嘅組織，叫「左翼廿一」啲成員，例如歐諾軒、郭永健等都紛紛成各民主派政黨嘅骨幹。

林鄭、大陸，就係睇準有佢哋嘅護航，今次將會大力推政策去打冧啲香港資產嘅生產力。最後賤價被大陸收購。唔信？就睇吓當政府以「打擊貧富懸殊」之名出手時，左翼傳媒同啲泛民點做。你手上如有啲港企股票，就要識執生啦。

金手指

---------------------
兩次聚會 六大名家
分享長中短投資部署
立即點擊參加
蘋果動新聞 x 瑞萬通博【亂市投資攻略】
活動詳情： https://bit.ly/2lMN6tE
-----------------------------
基金資料大集合 一書幫你贏盡強積金
點擊即睇《贏盡強積金》電子書