【新增內容】

之前被爆一腳踏五船的張致恒（Steven），今日在1號風球下，抱着3個月大的兒子天寶跟女友雯雯註冊，由Steven的爸爸和雯雯的媽媽主持簽紙儀式，惟Steven的荷蘭籍媽咪、前歌手胞姊張詠恩和姊夫商台DJ Donald都沒出席，只有10多位親友參加觀禮，而圈中人僅張彥博到賀，曾借錢給Steven還舊愛的關智斌（Kenny）和鄭希怡都沒現身。

為甚麽胞姊今日沒出席註冊儀式？Steven說：「本身家姐話趕過嚟，但佢好多嘢做，最終都係嚟唔到，媽咪就喺荷蘭趕唔切返嚟。」Steven因捲入桃色新聞形象破產，更拖累跟好兄弟Kenny的BOYZ紅館夢碎，幸Kenny獲英皇撐單拖開騷，而好友蔡卓妍、鍾欣潼、舊愛鍾舒漫就不值Steven所為，在IG取消關注他，對此Steven坦言：「識咗咁多年，佢嬲我都好明白，想同佢哋講聲對唔住，我令到佢哋咁嬲咁唔開心，請原諒我。」會否主動致電聯絡她們？他說：「過一段時間平息咗，再同佢哋道歉。」

12時20分，完成註冊儀式的Steven一家三口，帶親友到佐敦一間酒樓飲茶，包括張彥博和Steven的前英皇經理人Kitty媽，由於當時下着大雨，Steven表現出一個有擔帶的男人本份，沿途為老婆和仔仔擔遮擋雨。約下午2時，眾人醫肚後離去，Steven一家三口返抵旺角寓所樓下，抱實仔仔落車的Steven指自己好攰，並說：「阿仔平時都好嗲。」然後兩公婆帶着氣球和鮮花上樓。

Steven今晚在IG上貼上與老婆咀嘴和簽紙相，並透露簽紙結婚的心情：「今天的心情超級緊張，一直冒汗，昨晚還睡不着，我好想喺度感謝我嘅太太，佢為我生咗一個肥肥白白嘅BB，亦都包容我一直以來犯嘅錯，嚟緊嘅日子，我會盡我一切嘅努力令到佢同我個仔得到幸福！」而Steven另為太太被指黑面解畫：「好多報道所講我太太黑面，其實係因為佢只不過係一個普通人，未見過咁多傳媒影相，再加上超級緊張，所以先會唔識得畀反應，希望大家唔好介意。」

採訪：王連連
攝影：徐錦池、吳耀輝