高伯新今季操練模式明顯比往季積極得多，大閘、快跳樣樣做齊，與以往跳一課要抖兩日相比，確認馬匹健康全面復勇，馬房有望憑已熱身的第四場「超能量」開齋。此外，熱過身的馬較着數，還有徐廐第三場「雷公鑿」匆出有望放到。

第三場三班1650米：馬匹季初跑中距離，往往需求熱身開氣，就以剛周日（9日）兩組1600米為例，「電路二號」賺慢步速，另一組「總統至上」與「醒目再臨」鬥燒，結果「佳運來」漁人得利後上爆大冷，當然沙田與快活谷跑道不可相提並論，但熱過身總比初出馬較着數。

「雷公鑿」隔七日匆匆再出，上仗之敗可歸咎於重磅，亦可以話1200磅馬需要一場真正賽事做熱身，對粗身馬跑起狀態最有幫助，睇番上周三（5日）沿途走位，B欄大利中外檔馬匹衝，沿途守在貼欄第三位的「雷公鑿」，或多或少輸賽事形勢。

今次用黃俊減十磅，比上仗少負八磅，再睇同場只有「嘉應之友」剛周日熱過身，「雷公鑿」抽一檔，又輕磅，擺前單騎領放，贏面機會極高。

第四場四班1200米：「超能量」隔十日再上陣，上季尾試閘加眼罩一放到底，略嫌當日口勁仍重，今季嘉年華大閘剩用耳套教馬留力，效果令人滿意，開鑼日（2日）頭場1000米抽一檔，起步三兩箭步已四匹馬平排鬥燒，全程望空上口，捱到拉士最後五十米才被「勝利鑽石」趕過，跑法上未必係騎練賽前預計。

今戰回師谷草1200米形勢立即不同，再抽一檔有遮檔，早段留力，待直路移出才爆後勁，上仗拚後隔五日已在大圈快跳，見捉得住做慢時間，證明跑過一仗洩火後做到外勁內斂，高伯新甚少新馬可連貫有好演出，質素在四班肯定超級。