由無綫助理總經理杜之克同綜藝科製作資源總監余詠珊兩大高層，早前拍板購入大陸劇集《琅琊榜》被安排喺晚上9時半黃金時段播出，為咗谷呢套神劇嘅收視，大台連星期六、日都播埋，仲每次連播兩集「益」觀眾，等啲歡眾可以一次過煲劇，不過大台好似唔多「煲」得成!

查實《琅琊榜》喺周一播出嘅第十五集，已經以最低收視15.8點(102萬人次收看)，平均收視16.2(105萬人次收看)，創下黃金時段外購劇最低收視紀錄。喺周六周日懲罰觀眾連播兩集嘅情況下，似乎谷唔起收視，上周六(4號)播第十八集最低收視係13.3點(約86萬人次收看)，而周日(5號)播第十九集最低收視就有14點(91萬人次收看)。

講真呢套劇喺大陸真係有唔少人睇，之但係落到嚟香港就有啲「水土不服」，反而港人唔多like，高登都有post留名等睇「腰斬」，有網民分析外購大陸劇嘅死因，一來係「聽到啲配音都想熄電視」；二來係啲師奶係聽電視多過睇，好似呢啲大陸劇喺內地播，人哋預計好係每次兩集咁睇，內地播5日睇十集已交代角色背景，香港冇咁多時間播，好多時都拖成半個月仲睇緊交代角色背景，點會令觀眾有心機長「煲」，唔通呢個就係外購劇跌穿收視「水土不服」嘅原因!!!