懷孕5個月嘅林芊妤（Coffee）今日聯同美女學徒伍樂怡（Kelly）、余潔瀅（Zoe）同陳晨（Elsie）喺銅鑼灣出席Catwalk騷。

余香凝被爆一腳踏兩船，近日同陳家樂分手，作為妹妹嘅Zoe都有關心家姐，但對方好忙唔喺香港，呢幾日冇見面，被問有冇見過家姐男朋友？Zoe話：「佢冇拍拖。」Zoe話大部份家姐嘅朋友都識同埋有見過，而被傳係第三者嘅保險高層Victor就冇見過。至於家姐以前係咪好多男朋友，Zoe就話唔係。

美女學徒Kelly被指得大台力寵而成犯眾憎，Kelly都覺得公司錫自己，可能工作夠積極，但唔覺犯眾憎：「冇咁嘅事，我覺得人緣唔差，大家相處融洽，唔使拍嘅時段有傾偈。」在旁都係學徒嘅Zoe都話唔覺：「放Break時我哋有一齊去買嘢食。」kelly話一班人冇約出街，但都好平衡會一齊傾偈，節目中較老友嘅都係一班曾一齊主持過兒童節目嘅女學徒。

新婚嘅Coffee腹部只是微隆，已知BB性別係男仔，驟眼睇唔似大肚，不過佢話：「已經肥左十幾磅，可能我之前太瘦。個肚唔係好大，搭港鐵唔會有人讓位我坐，反而早幾日搭車見個大肚婆，我讓左佢坐先諗起自己都大肚。」Coffee打算選擇順產，而依家暫未買嬰兒用品。佢現時仍有接工作，家人並冇阻止：「老公屋企人早排喺香港，臨走都有叫我唔好咁辛苦，但好好，冇俾說話我聽，依家我接嘅工作都係好輕鬆。」

精選娛聞，喺晒《娛果》
http://fb.com/appledailyent