古巨基近日密鑼緊鼓為下周一在紅館舉行的處男個唱作好準備,因今次演唱會反應十分熱烈,故他會在下月六至九日再加開四場,門票於明天公開發售。
摸摸吓好肉酸
基仔昨日繼續練歌及增肥,為了個唱,他自爆獻出了三個第一次,他說:「我第一次開紅館個唱就係人都知,我重第一次跳舞,因為排舞太落力,搞到周身梗晒,所以我前幾日第一次去搵推拿師傅,咁大個仔都未試過,本來以前覺得俾人喺個身度摸摸吓,好似好肉酸咁,估唔到原來咁舒服,按完後真係全身鬆晒。」
基仔表示每天日間練歌,晚上排舞,操足十二小時,本來之前他節食減肥,十日內減掉十磅,誰知營養師竟指他減肥過度,要他增肥,基仔說:「除咗話我瘦得滯,重因為我跳舞要力氣,身體太虛都唔得,我𠵱家一日五餐,大魚大肉,重日日食燕窩,我諗都冇歌手開演唱會前咁食法。」
為了保養身體,以最佳狀態開騷,基仔連睡覺也不鬆懈,他說:「呢幾日天氣凍,我驚自己感冒,於是着住羽絨褸瞓,重冚三張棉被同用一張電氈墊底,咁先捱得過呢個冬天,我阿媽都話我誇張,但我覺得啱啱好。」
勸歌迷保健康
基仔謂明天公開賣飛,擔心歌迷冒寒排隊,他說:「其實我公司內部認購都爆晒,希望啲fans着多件衫啦,保重身體嚟睇我演出。」