基金Ｋ請吃晚飯，叫我哋去尖沙嘴樂道一間海鮮酒家，基金Ｋ本是中環客，何解叫晒我哋過海吃飯？基金Ｋ話佢不時到文化中心聽音樂，入場前搵到呢間海鮮酒家吃飯，嚟過幾次，覺得唔錯，故此輪到佢做東時就選咗呢個地方。
食落，啲海鮮叫做唔錯，大家冇乜苛求。去文化中心參加音樂會，最麻煩一回事就係自地鐵站行過去，不甚方便，如在樂道吃飯，行去文化中心真係有排行，尤其是近來近住YMCA嘅隧道入口封咗㖭。設計道路通行嘅，不知是何部門，總之將文化中心變成一個孤島，對傷殘人士絕不友善！
是晚知道香港失業率創三十八個月新高，但本港樓市甚為暢旺，我哋請基金Ｋ與分析Ｆ解釋，基金Ｋ堅持睇淡，恒指挑戰萬六點，只係熊市反彈，之後仲有得跌。分析Ｆ對新蒲崗新樓盤嘅暢銷，嘖嘖稱奇，更估唔到平均售價會達到七千五百元（一平方呎）。該樓盤附近一帶，是甚麼龍蛇混雜環境，分析Ｆ話不便多講，自己去行一轉便知，佢嘅解釋就係利率太低，低息供樓效果開始發揮威力，加上新盤供應量太少，故此樓價看好，而大型屋邨嘅租金亦看漲，主要原因係豪宅租金下滑，受減薪或裁員影響嘅外資行員工要搬離豪宅，搬去大屋邨也。正是大屋搬細屋，大屋租金跌，細屋租金升。

財務Ｒ就話佢啲朋友嘅豪宅最近頻頻流失租戶，一位畀開十幾萬月租嘅美國人已搬去梅窩，搵唔到人續租，嗰啲月租三、四十萬元嘅大單位，更加冇人上門睇樓。以前有大把花紅，月租四十萬元，邊算係錢呀？家呢？諗吓都係罪過。地產Ａ就話不如搬去元朗啦，住在西鐵站上面，坐車返中環國金二期都只係半個鐘頭啫，租金便宜好多好多噃，最多咪自國金二期寫字樓放工後，唔去蘭桂坊！其實家都冇乜錢去蒲嘞，香港人需要返璞歸真，埋首苦幹，暫別銷金窩。或者大家已經付諸行動咯，呢間海鮮酒家得幾枱客，馬路對面嘅茶餐廳就人氣旺盛，見唔到有吉位，而周街都係的士，左丁山見狀，覺得都係早啲返屋企好過。