李克勤出道咁多年，大大話話都出過起碼50張廣東碟(未計精選、國語碟)，每十年揀一首作表作，佢會揀：「80年代我會揀《月半小夜曲》，因為係我揀嘅第一隻歌，當時見到河合奈保子喺一個透明鋼琴彈出嚟好靚。另外想講，唯一呢隻歌喺我過往嘅唱片入面出現過兩次，第一次就係《命運符號》，當時我覺得唱得唔係幾好，於是我就喺《一生不變》隻碟再唱多次。不過，原來有啲嘢再做過，以為做得好啲，其實未必㗎，即係我o依家聽番，都好似舊版本會比較好一啲。」

「到九十年代嘅時候，我會揀《紅日》啦，每一次例如演唱會度唱，大家都會好興奮，覺得幫我自己打氣咁。」

「千禧年代，我覺得係《我不會唱歌》，同郎朗嘅合作就開始引入到我演奏廳嘅內容，或者同一啲管弦樂團合作嘅一個先河。」

「到最後嘅201幾年，我會想講《一個都不能少》，呢隻歌係我想多謝，所有係我過往嘅時間裏面幫過我嘅所有朋友、貴人，係一隻感謝嘅歌嚟。」

今年12月就50歲嘅克勤仲擺番多張舊唱片封面嘅甫士，其實佢個樣都唔算變好多、髮型又唔算變好多吖！

採訪：余燕儀、懷鈺
協力：劉嘉慧
攝錄：馮峰、Neo
攝影：葉君海
場地：祥勝茶餐廳
造型：Queenie Yu
髮型：Adolph Bow
化妝：Angel Y