林嘉欣今日喺天際100宣傳新手機，講到話即將要投入張家輝同劉青雲合作嘅電影《廉政風雲煙幕》，佢話今次同青雲嘅戲份唔係好多，大家只係要用電話溝通，反而同家輝有啲戲會喺澳洲開工，預計下月中去當地拍攝接近一個月。

嘉欣話：「我已經同屋企人請晒假，到時要老公同屋企人幫手湊女，好彩0依家佢哋返全日。囡囡都好包容，明白媽咪要復出拍戲，唔使好特別溝通。」又笑言：「我平日留喺屋企時間已經好多，而且0依家科學昌明，好多時用視像或者影相都可以同大家溝通，不過會喺香港過埋母親節先！」

活動上，嘉欣又分享攝影心得，原來佢早前坐電車出動影相，部份照片由老公袁劍偉操刀， 一向上鏡嘅嘉欣話唔使P圖，不過面對一啲高科技產品，佢就好似細路女一樣，完全唔識、要依賴老公，仲話：「對呢方面嘅認知左耳入右耳出，對我嚟講好似外星語，所以經常向老公嗌救命，例如電腦各樣都要靠老公安排，老公都習慣咗要幫手！」

精選娛聞，喺晒《娛果》
http://fb.com/appledailyent