如果「官到無求膽自大」，政府新聞處嘅公務員，似乎係膽生毛嘞！特首梁振英囡囡梁齊昕大鬧蘭桂坊當晚，鬧爆問佢去邊嘅的士司機：「我去邊度關你L事呀？」網媒《100毛》嘅毛記電視即時抽水，喺facebook出咗張禮賓府嘅外貌相，並加咗個「邊度關你L事」（Noneofyourbusinessstreet）嘅長形街道牌，簡單嚟講，即係話「禮賓府」等同「邊度關你L事」。

估唔到政府新聞網中人，竟然同呢班毛孩一樣咁「風趣」，佢哋喺facebook宣傳禮賓府開放日嘅貼文，同樣整咗張禮賓府嘅外貌相出嚟，但就加咗個「去呢度關你事」嘅長形街道牌，留言：「【冇改名】。禮賓府仲係禮賓府，唔信禮拜日嚟睇吓～～」仲tag埋100毛個facebook㖭。

新聞網呃like抽水功夫了得，難怪《100毛》留言大讚「多謝政府新聞網咁幽默」，同時順便叫新聞網回應：「係呢？689幾時先肯落台，順便關心多啲香港女兒梁齊昕呢？」有網民大讚新聞網好夠膽，但亦有網民替呢班員工好擔心，皆因方丈好小器㗎喎！