黃榕除夕生日無着落嘆寂寞 羨慕好友楊曉穎拍拖幸福肥
蘋果日報 2020/12/28 19:25
黃榕健身幸福肥楊曉穎
黃榕近年主力向健身行業發展，練出一身肌肉線條，好姊妹楊曉穎淡出模界向藝術發展。兩人今日聚首拍攝教減肥片段，即場扭動腰姿示範減肥呼拉圈。
黃榕苦練日子有功，沒有肥肉脂肪，她說：「想練大隻啲，平時鍾意舉啞鈴，但呢個呼拉圈可以一邊傾偈一邊玩。」黃榕除夕夜踏入39歲生日，並說：「年年18歲，咁多年都冇數住自己幾多歲。今年因為疫情關係冇心情慶祝，只會同屋企人食吓飯簡單過，都好寂寞。」
身邊楊曉穎卻大晒拍拖幸福肥，與身在加拿大男友拍拖兩年多，仍處於甜蜜熱戀期，她笑說：「拍拖好食好住，人懶咗，幸福肥，男友就肥喺啤酒肚。」黃榕聞言即羨慕表示：「我已經3年冇拍拖，運動變咗我嘅情人。」楊曉穎今年2月跟男友暫别後只靠FaceTime維繫，因時差問題常在香港時間半夜開餐吃零食，導致心廣體胖，她計劃農曆年後會到溫哥華和男友相聚。
工作方面，黃榕透露年底的商業演出全告取消，只好乖乖留家抗疫。楊曉穎在1月會舉行畫展，展出15幅作品包括風景、季節等色彩主題，希望帶出開心，舒緩大家過去一年情緒。
黃榕嘆自己單身過生日，聖誕工作又被取消。
蜜運中的楊曉穎大晒拍拖幸福肥。
兩人親自示範減肥呼拉圈。
黃榕羨慕楊曉穎有拖拍。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！