患嚴重風濕病的阿玲，一家五口近日獲房屋署體恤分配公屋單位，得以減輕租金負擔及找到安定居所。奈何阿玲靠綜援金勉強維持家計，無力應付搬遷的龐大支出，且缺錢為七歲長子訂購新校服。蘋果日報慈善基金即時撥款，助飽受貧病交煎的阿玲解決經濟困難。

四十二歲的阿玲向到訪記者訴說：「呢座唐樓經常有閒雜人出入，環境又污穢，唔似得公屋單位地方新淨，而且租金合理。所以我收到房署通知可以『上樓』之後，真係想即刻搬，可惜自己冇錢搞搬屋！」

受病魔折磨辭工
阿玲曾先後任職製衣廠及酒樓女工，刻苦耐勞；近年飽受病魔折磨，才被迫停止工作。面色欠佳的她歎謂：「我生咗大仔冇幾耐就去酒樓返工，勤力搵食，好少休息；直至兩個孖仔出世之後，我周身風濕骨痛得好犀利，至冇辦法繼續做嘢。𠵱家就算大熱天時我都成身痠痛，經常腳趾抽筋、兩隻腳由骨裏面痛出嚟。醫生話我嘅症狀係產後風，冇得醫；咁我惟有靠搽藥油令身體冇咁唔舒服。」
阿玲育有三名兒子，長子現年七歲，就讀小學二年級；一對孖生稚子未足兩歲。近年阿玲的丈夫只能在內地覓得散工糊口，收入極少；阿玲目前需靠綜援幫補家計，生活儉樸。「我自己唔食早餐，中午多數食粥或者米粉，晚餐至煮菜同蒸隻蛋送飯。另外我好少帶大仔出街玩，免得要使錢。」
阿玲稱，她最感安慰的是，長子輝仔一向專心讀書，成績優異。「輝仔自細識得自動自覺做功課同溫習，佢上學期考試考到全班第二名、全級就第三名，令我好滿意。佢又好生性，平時見到好鍾意嘅玩具，都唔會扭計要我買畀佢。」