陳彥行（行姐）、利嘉兒、李麗蕊等，日前為nowTV節目《娛樂審死官》錄影，更講到飯局係咪娛樂圈潛規則嘅問題。

利嘉兒早前透露曾拒絕無綫高層邀請飯局而遭雪藏，李麗蕊亦喺節目中講到，以前喺大台拍《歡樂今宵》時，曾被邀出席飯局經歷，佢話：「當時我算係節目中其中一位力捧小花，有一次工作完咗之後，有個幕後姐姐同我講有宵夜飯局，有啲我唔識嘅人，不過我當交多啲朋友，本來我都打算去，但嗰位姐姐最後加咗句食完宵夜有利是收，我聽到覺得唔對路，最後都冇去到。」

節目期間，主持梁思浩又大爆行姐離開無綫後，到北京電影學院進修，被內地知名經理人睇中，要求發生關係，換取工作機會，行姐憶述事件時話：「嗰位外型討好嘅經理人，我哋係經熟人介紹而認識嘅，佢旗下都有一位當紅內地女星。佢有一日突然嚟香港搵我食飯，我喺佢住嘅酒店大堂等咗45分鐘，對方話同美國電影公司開緊視像會議，仲叫我上房加入。」

行姐又話當佢上到房之後，只見該經理人只穿浴袍，而且周圍都係女性衣物：「我估係佢旗下女星啱啱走，言語間佢話我着得太保守，應改穿性感露腰衫，又暗示床已經準備好，若我陪睡就有演出機會，不過我最後都選擇離開，佢之後都有打畀我，鬧我做人太冷冰冰，這樣不能討人歡喜，那怎樣介紹導演給我呢！」行姐話聽完呢番先恍然大悟，原來服侍不只佢一人，就連其他導演都要服侍先可以換到機會，佢覺得太恐怖，情願放棄。