【新增演唱會內容及圖片】
韓國天團BIGBANG嘅隊長G-DRAGON(GD)前日正式回歸，今日就喺首爾世界盃競技場舉行世界巡迴演唱會首場《Act III, M.O.T.T.E》，當中GD更邀得「國民妹妹」IU做演唱會嘉賓。

而喺開騷前，GD下午就到達現場進行綵排，有唔少購買咗睇綵排嘅粉絲都有入場捧場，只見GD落力進行綵排，睇得粉絲如癡如醉。根據現場粉絲表示GD喺現場先後唱《This Love》同《Crooked》，佢話佢會早點完成綵排等佢可以有多啲時間準備個騷，同時佢又窩心提醒粉絲今晚有啲凍，叫佢哋着多件衫。

大約到香港時間7時許，GD首爾個唱終於開鑼，佢穿上紅噹噹褸出場，載歌載舞之後，就除掉外套，露出裡面嘅紅色see through恤衫襯紫色圍巾，好鬼搶眼。而GD嘅隊友太陽同大成，以及Sandara、師弟團iKON同埋老友李洙赫都有來捧場。至於擔任表演嘉賓嘅IU就穿上一條紫色性感長裙示人，非常美艷。

而今晚首爾騷都發生小插曲，當GD喺台上表現時，有名女粉絲就突破重圍衝咗上台先扯住GD件衫，跟住就將GD拉近自己，繼以攬住GD，不過GD就處變不驚，繼續表演，之後該名女粉絲就被保安請咗落台。

GD喺台上話自己好耐冇開演唱會，所以有啲歌嘅歌詞都唔記得，搞到佢要喺屋企背歌詞，佢仲感激話今次《母胎》演唱會係第一次，也可能係最後一次，GD話：「呢個演唱會叫母胎，韓語有個意思就係不能，當初演唱會差啲搞唔成功，好在之後都克服晒啲困難。」 而今晚除咗IU撐場外，原來GD老友CL都有來做嘉賓，CL仲同GD喺台上表現，GD仲學CL露膊頭，搞到露點示人，令全場粉絲即時大叫。

另外，GD嘅回歸專輯今次USB形式出售，非常有新意，同時仲有「KWON JI YONG MAKING COLLECTION PHOTOBOOK」推出，當中不乏GD赤裸上身照，睇到粉絲流晒鼻血，自然被搶購一空。