中國足球有救喇！最近國足喺東錦賽僅獲第3，但最後一仗3:1擊敗北韓終於搵到贏波竅門——走「魔鬼足球」路線：實行用茅招嚇窒對手，用詐死戰術拖垮敵人！
回顧東錦賽，國足3場波攞到17張黃牌、兩張紅牌。頭兩場負南韓同日本時，分別4及5人領黃牌；到最後一場3:1擊敗北韓，就有8張黃牌、2張紅牌，14位上陣球員有8人攞到牛肉亁。根據以上數據分析，唔通打茅波先係中國足球嘅出路？
唔係淨係我咁講啊！國足嘅塞爾維亞籍教練柏杜域（內地譯福拉多），賽後亦肯定隊員嘅表現：「中國隊起碼應該得到最有鬥心獎！」東亞足協日前亦罰咗國足4,500蚊美金（約35,000港元），以懲罰頭兩場嘅「黃潮」，不過筆數都唔夠國足球員食餐飯，所以唔使洩氣㗎！

李瑋峰揸對手條頸

中國傳媒就以「中國黃牌隊」形容國足，我求大俠認為呢個世界又唔係得巴西隊贏到世界盃，既然國足技術不如日本、體能不及南韓，點解唔走「魔鬼足球」路線呢？「茅柴」烏拉圭都兩次捧到世界盃啦！
講真，打「魔鬼足球」真係冇邊隊適合得過國足。李瑋峰揸住鈴木啓太條頸，徐雲龍嘅報復，宗壘嘅拖時間，呢啲根本就係國足嘅生活習慣。不過，好似籃球員王治郅日前喺北京揸車同人打交咁，中國運動員好應該改變偏激行為做好榜樣，唔係個社會就會愈來愈亂。
好似《少林足球》嘅魔鬼隊咁踢波，雖然未嘗唔係贏波嘅一種方法，但我求大俠覺得中國既然係堂堂大國，咁做有失國體，不如柏杜域諗吓點善用中國球員心目中嘅呢團火，用嚟攞好成績仲好啦！