效力英格蘭非聯賽球隊瑟頓聯、身型貌似布歐嘅守門員梳爾（Wayne Shaw），今年初因為喺後備席食pie而捲入賭博風波。梳爾周四接受傳媒訪問，並為事件致歉，話：「我咁做係有啲幼稚。」

梳爾喺周四話：「我覺得我係有少少幼稚，而我當時（食pie）只係想開玩笑，但球會唔相信我嘅解釋。」梳爾又話：「呢件事足足纏繞咗我7個月，而事件如今終於完晒，我依家感覺幾好。」

件事其實發生喺今年二月，瑟頓聯喺足總盃16強迎戰阿仙奴時，坐喺後備席嘅梳爾即席「表演」食pie。而英國一間網上博彩公司就「咁岩」係賽前開出盤口，賭梳爾會喺比賽期間食pie，賠率更有9倍咁多。足總事後對梳爾處以375鎊（約3,860港元）嘅罰款，並停賽兩個月。雖然梳爾被罰停賽，但係佢已經搵到新工，就係喺係非聯賽球隊AFC托頓擔任經理。