【李八方online】林鄭巡康美樓狂同保安握手 全程「零」消毒
握手林鄭消毒武漢肺炎
行政長官林鄭月娥一直堅稱,港府喺抗疫路上每一個決定,都係以科學同理論為本。咁就奇喇,內地衞健委講咗個幾月叫人唔好握手;林鄭嘅專家組成員、港大醫學院院長梁卓偉亦多次示範以手肘代替握手禮(elbow bump),但林鄭星期三(4日)朝早去「疫廈」康美樓巡視嗰陣,就肆無忌憚同保安握手,事前事後都疑似冇用酒精搓手液潔手。究竟佢嘅科學同理論,喺邊度學返嚟?
話說林鄭帶住運房局長陳帆,星期三朝早煞有介事巡視長康邨嘅康美樓,了解已經隔咗大半個月嘅緊急疏散行動同流行病學調查嘅經驗所得。八方細嚼新聞稿嘅空洞內容之後,抱住「順手睇埋」心態欣賞埋政府新聞處拍嘅短片,點知竟有驚人發現。
大家可以由條片第1分43秒開始睇,林鄭喺下屬引領之下,由康美樓大堂行埋去保安崗位,同等候多時嘅保安姐姐傾偈。兩秒之後,保安姐姐好熱情咁伸出右手;林鄭見狀,用0.5秒思考完就伸隻右手握埋去,握完之後仲同自己隻左手十指緊扣,放喺枱面上。
直到第3分13秒,就見到林鄭出返去大廈外面,用手揸實塊白板,聽取職員講解外牆排污系統嘅資料,其間見唔到林鄭用酒精搓手液消毒雙手。再講白啲,成條片都冇見到喺林鄭出入大廈、同人有社交接觸前後清潔雙手。
究竟林鄭嘅科學同理論,喺邊度學返嚟?八方睇完都唔知,但一定唔係from梁卓偉、內地衞健委。可能,林鄭就係一切科學同理論嘅根源。
-----------------------------
【未敢忘記】03年沙士重溫
立即按此 -----------------------------
無懼警暴 學懂自救
《抗暴之戰●法例須知》
讀果 上架
-----------------------------