唔經唔覺今季已上演42次賽事，雷神扣除曾停賽四個賽馬日，一共38次賽事有馬贏，所以佢有馬贏係指定動作。

不過問題係雷神幾乎次次騎足額，一日贏兩WIN對馬迷基本上幫唔到手，雷神自己已盡晒力，冇可能係你一個人玩晒。雖然雷神獨步香港馬圈，但其他騎師一樣搵到食，而且好明顯條路係輪住贏！郭能、祈普敦、蘇兆輝輪住一日三WIN，羅理雅剛戰夜賽爆三隻冷門，即使巴度停賽前都贏口冷孖；與其嘥時間去度雷神到底贏邊隻，倒不如諗諗今次會輪到開邊個仲好！只要估中一次，好過買中雷神幾隻WIN。

今期(5日)最有機會輪到田泰安，事關兩隻「魅力」已擺響度等緊機會，第四場「魅力知寶」近兩場縮響後面拉士都有段睇，尤其係上場1400米大慢閘跑讓賽，今次笠個眼罩上去，變身大條道理；第五場「魅力知友」上場初出即跑谷草1650米，排個12檔直路飛出九疊發力，居然交到拉士23秒06衝近，復課試大閘勝出，今次睇落有手影。

田泰安仲有第六場「銀豐神駒」，前仗三班田草1400米已經跑得好近，今仗落四班跑點計都有利，賽前試課泥閘撲上同當打之「鐵男」一齊過終點，好明顯呢隻腳患馬目前健康OK。