從政係不歸路，行到入立法會更加邪，唔知係方位唔啱，定係剋星當道，女議員好似命中注定缺乏異性緣，新一屆立法會唔知有冇人打破宿命?公民黨36歲新星陳淑莊（Tanya）噚日接受電台訪問時，被問到感情生活，好多人知佢名花有主，男朋友繼承父業，係尖沙嘴老牌京川菜館「仙宮樓」嘅老闆叢鐵飛，圈中人暱稱叫佢「英雄」。

男友教陳媽媽派單張

Tanya話今次選舉，男友只係幫忙派過一次單張，事緣陳媽媽唔識派單張又想助選，Tanya就搵英雄護花，佢話男友早就見過家長，幾乎個個星期日一齊飲茶。八方問佢幾時好事近，四年內會否結婚?佢笑言都想破除獨身女議員好似總係嫁唔出呢個「魔咒」，不過冇諗過呢個問題，因為𠵱家工作纏身，既要開新辦事處，又要請職員，忙到暈低，兒女私情擺埋一邊。
男友係食肆老闆，Tanya呢段情都係為食而起。話說幾年前佢同幾個朋友去英雄間仙宮樓食飯，點咗其中一味招牌菜清蒸鰣魚，條魚一上枱，果然好正，Tanya好似隻貓咁耷低頭食到唔停得口，英雄見呢個女仔好文靜，又識欣賞美食，引起好奇想識佢，兩人就此結緣。不過呢段情又可以話係因誤會而起，Tanya話其實佢只係得嗰次食魚收吓把口，表現出佢文靜一面，平時嘅佢口水多過茶，總之有佢講，英雄得個聽字。

拿手意大利菜送上門

Tanya自言十分為食，拍拖最大節目就係四處搵食，英雄亦煮得一手好菜，最拿手並非京川菜，而係意大利菜。原來英雄前妻係意大利人，以前喺意大利住咗十幾年，白汁煙肉意粉同雜菜牛尾湯都係Tanya至愛，Tanya參選時冇啖好食，英雄會煮好「叢氏私房菜」送上門，好體貼。
54歲嘅英雄係山東人，有人話既然有個北方人男友，應該食住上，開間分店喺北角，搶埋蔡菜子啲票，Tanya形容間菜館只係「細細哋屋企生意」，笑言都「恨」咗好耐有間北角分店，因為佢自己喺北角大，不過佢為食不分省籍，拉票都一樣，冇分嘅。聽日（14日）就係Tanya生日，八方喺度預祝佢生日快樂，如果佢真係打破女議員不嫁魔咒，記得請埋八方去飲呀！

mailto:[email protected]