如果話A股港女化，相信冇乜人會反對，幾個特徵同你睇真啲。特徵一︰大癲大肺。齋睇上星期五，頭半段開香檳，滬綜指完美升穿3400點，後半段即變臉，埋單倒跌收場，3300點不保。稍一不慎，隨時俾佢左一巴右一巴狠狠地摑，人財兩失。特徵二︰我行我素。早幾年歐美股市喪炒放水效應，頂位破完一個又一個，A股呢？睬你都儍，逐個逐個底係咁穿，甚麼2000點大關、建國底、辛亥革命底全部變豆腐底。近排美股高處不勝寒、歐債危機重現，A股就反高潮做唯一的牛市，係唔聽市場支笛吖，吹咩！

以不變應萬變

特徵三︰自視極高。A股雖然散戶多，但唔好理，單日成交動輒過萬，宇宙最強，話之你有冇得玩，自己炒到㷫恰恰。咁多年一路未有沽空機制，亦冇得玩即日鮮，想埋堆？分少少QFII同滬股通額度畀你囉。
A股港女化鐵證如山，冇得抵懶。可惜，港女雖然難以駕馭，卻有其可愛之處，總能令男人死心塌地，既然未能征服她，唯有迎合她。最佳方法，以不變應萬變，信A股係牛市，就揸實概念股，唔理佢短期波動，等長線修成正果。正如港女總有成熟的一天，默默用誠意打動佢最實際，屆時多添一份韻味，更加啖得杯落！

唐牛
https://www.facebook.com/tongcow88