今年係《鐵達尼號》（Titanic）上映20周年，早前大導占士金馬倫（James Cameron）受訪就解釋點解要整死Jack。

連結： http://bit.ly/2AP8ncr

而女主角琦溫絲莉（Kate Winslet）亦再為《鐵達尼號》揭秘，當中仲有消息從未公開，包括Jack原來另外一個人選同樣係影帝級人馬！「我同馬修一齊試鏡，好奇怪呢？我從來冇公開講過呢件事。」原來當年同琦溫絲莉對戲嘅並非里安納度狄卡比奧（Leonardo DiCaprio），而係同屬影帝級人馬嘅馬修麥康納希（Matthew McConaughey）！不過最後導演都揀咗里安納度。

另外戲入面仲有大家難忘嘅「車震」場面，戲中Jack同Rose於車廂內激戰，之後仲整到玻璃都充滿霧氣，Rose一隻手掌拍上玻璃，呢一幕絕對係經典。但原來當中都另有故事：「我唔認為劇本入面有呢場戲，我諗係我哋當日於片場臨時加戲嘅。我哋於車內確實汗流浹背，但劇組都用礦泉水噴於我哋身上，等我哋睇起嚟有激戰過後嘅感覺。」結果就造就呢幕經典。

大家應該都仲記得畫家Jack為Rose畫嘅裸體素描，為此琦溫絲莉再大爆秘密：「幅畫係導演占士金馬倫畫嘅。」估唔到大導咁好畫功！另外琦溫絲莉又話拍攝時啲水確係好凍，所以戲中好凍嘅表情都係真嘅：「我直頭有失溫症，因為我真係好X凍。」之後仲同節目主持Stephen Colbert重演上木板一幕，非常搞笑。

更多娛聞，喺晒《娛果》
http://fb.com/appledailyent