商務及經濟發展局局長馬時亨每年都會搞餐全羊宴，請傳媒記者搞關係，今年都唔例外，例牌有隻烤全羊，噚晚仲搞搞新意思，請咗本港知名漫畫家李志清嚟贈興，幫與會人士畫人像畫。
一班記者排隊做model，肥馬都唔執輸，李志清好客氣，筆下嘅肥馬唔知點解忽然瘦身好瀟灑，仲要着住件好有祖國feel嘅唐裝衫，連肥馬都笑騎騎咁話：「睇嚟我都要瘦番廿幾磅，仲要得閒買番件唐裝衫至得！」呢啲場合名為聯誼，其實記者都要攞料，肥馬猛咁叫人食嘢，用食物塞住記者把口同自己把口，等大家冇得問佢又冇得答，肥馬手下見局長封嘴，亦奉旨唔使爆料，一味食，好高興。