國際泳聯（FINA）改革越變越衰，「鐵娘子」賀素呼籲泳手起義！FINA上月底宣佈以「吸引更多星級泳手，提升呢項頂尖賽事嘅曝光率」為由，就今年游泳世界盃修改規例，主要變動包括一個泳手每站最多只可以參加4項賽事，又對奧運同世錦賽獎牌選手提供直接躋身決賽嘅「優惠」，其中28歲匈牙利泳手賀素被視為首當其衝，因為佢喺過去一季9站賽事以「跨泳式、跨距離」方式報名參賽，最終橫掃73金、23銀、9銅佳績，並贏得386,000美元獎金。不過，喺泳手收入同獎金唔算特別豐厚下，賀素以至多位全能泳手喺新規例下備受掣肘，於是「鐵娘子」周三喺社交網站發表公開信，呼籲泳手團結一致撐到底！

賀素喺公開信中表示，職業泳手喺泳池外同樣需要維持生計，批評FINA嘅做法猶如視之為業餘運動，「NBA會否限制巨星之一勒邦占士，下年唔准參加總決賽？ATP會否逼迫拿度同費達拿，指佢哋嘅時代已經結束？」佢又指控呢項政策間接「陰乾」世界盃嘅叫座力，從而令唔會同運動員分享收益嘅兩年一度世錦賽更「吸金」，又表示唔想要直入決賽呢項優惠：「我想同年輕泳手爭奪決賽席位，無論佢係Iwasakis或者Egerszegis，如果佢哋14歲就游得比我出色，更要畀佢哋展現天賦。佢哋喺新規則下『輸在起跑線』，要等到頂尖泳手老去或者退役先可以享受呢項優惠，實在唔公平。」賀素最後借1973年前南斯拉夫網球一姐比歷（Nikola Pilić）被國內當局禁止出戰溫布頓、引來81位球手杯葛賽事嘅例子，呼籲泳手團結起來：「機會就喺面前，但必須要由我哋把握。就好似每次比賽，我哋都需要一齊起步，但今次並非對手，而係團結一致作戰。」