嗜地成狂嘅信和主席黃志祥又投到地，雖然俾人質疑佢同南豐未傾掂數前，最尾幾口價鬥到出晒面，問佢究竟係咪買貴咗，答案梗係例牌話冇啦，但睇佢做訪問時全程四萬咁口，講唔夠兩句就忍唔住「哈、哈、哈」大笑，睇嚟應該係發自內心咁覺得自己冇買貴嘢。
「冇買貴地」呢個信念喺佢腦海入面真係好堅定，話說當記者問佢未來幾年新樓落成量跌，擔唔擔心市場會出現斷層嘅時候，佢就勁興奮咁話：「嘩！咁你即係話我買咗平嘢？多謝晒你喎，今晚要請（你）食飯，哈哈哈！」仲同隔籬嘅呂耀華講：「話我哋買平嘢喎，真係未聽過人咁講，好開心。」
雖然嗰位記者攞唔到答案冇得交差，但誤打誤撞𠱁到黃主席鬼咁高興，點名要請佢食飯之餘，亦都帶契埋一班攝記大佬，事關開心到飛起嘅黃主席有求必應，知道有人影唔到佢同呂耀華握手，即席同華哥表演180度巡迴握手，畀班攝記大佬影到夠為止。

另外，黃主席亦親身上演咗一齣「商場冇永遠敵人」嘅好戲，話說舊年佢投九龍塘廣播道地皮時，又係同南豐爭到頭崩額裂，當時黃主席仲「暗寸」南豐嘅蔡宏興，問佢做乜唔一早講有興趣，等大家可以fifty-fifty。事隔幾個月，又真係俾佢噏中，大家fifty-fifty合作買白石角A地盤，佢仲幫趕住走冇做訪問嘅蔡宏興同記者道歉，轉數快把口又咁鬼叻，真係要寫個服字畀佢。
[email protected]