事隔近十年，香港足球代表隊再次晉身東亞足球錦標賽決賽周，挑戰日本、南韓及中國三支東亞勁旅。今次是香港第三度出戰東錦賽決賽周，曾有4位港將出戰2屆賽事，包括現任南華主教練潘耀焯，而葉鴻輝將會成為下一位「兩朝元老」。東錦賽對葉鴻輝來說是特別的，它是葉鴻輝在港足的開始，是他取得首頂「喼帽」的賽事。九年過後，葉鴻輝成為必然主力，當過隊長，現在也卸下了臂章，77次代表香港上陣亦是紀錄保持者。

10年前那個冬天，葉鴻輝在香港大球場助香港勇奪東亞運足球賽金牌，球迷開始稱他「英雄輝」，儘管他不太喜歡這個外號。兩個月後，2010年2月，港足赴日本出戰東錦賽，當季東方自降，阿輝改投天水圍飛馬，晉身了以南華球員為班底的港足，另外兩位門將均來自南華，包括大勇的何國泉和張春暉。首戰對南韓，阿輝未獲金判坤派遣上陣，第二場對主場的日本，機會降臨到年僅19歲的阿輝身上。

「田中鬪莉王、中澤佑二、中村憲剛、遠藤保仁、大久保嘉人，好多一線。」差不多10年前的那場球賽，阿輝仍能一口氣講出多位對手的名字，他說：「上一次都幾特別吓，自己第一次代表香港踢A級賽，第一場就要對日本，輸0:3，好難忘嘅經歷，第一次就對咁強嘅對手，嗰時日本唔係派二線，出咗好強陣。」二月的東京，寒冷，比賽當日更下大雨，「嗰時得三度，仲落雨，提場都提唔到，凍到塊面僵晒。」憶起當年在國立競技場的自己，阿輝形容是初生之犢不畏虎，「當時冇諗對手強唔強，係諗點樣可以踢好啲，證明自己。」

該仗阿輝三度被攻破大門，港足以0:3落敗，但對阿輝而言，這比賽是一生不會忘記的回憶，「有唔少嗰場嘅撲波，都仲會喺腦海記得番。」三日後港足對中國，阿輝續任正選，原來他早在第二次代表香港就已經對過中國隊，只是當年未至於叫做「大戰」吧，最終中國由「追風少年」曲波兩度建功，以2:0勝出，葉鴻輝以上陣2場失5球，完成他的首次東錦賽。

之後港足三屆賽事都未能晉身決賽周，每次都在次圈不敵北韓，2013年那一屆更有澳洲參與。直至去年，港足終於在台灣舉行的次圈壓過北韓，再入決賽周。然而，港足其實也只是賽和北韓，沒有擊敗他們，阿輝認為港足有力守和像北韓和中國這種對手，卻一直欠缺擊敗他們的板斧，「唔只對北韓，集中防守，每個球員都狀態好時，我諗邊一隊強隊想入我哋波都好難。但問題係對強隊，攻擊力要好好改善。」他認為本地賽的速度與這些強隊比，相差太遠，「出到國際賽，速度對抗性比起本地聯賽係強好多，後場攞到個波都好快失咗，防守反擊好難靠一個人係前面就算。有啲球員喺本地賽速度好快，但出到去其實好普通。」

接下來港足要在八日內與日本、南韓及中國交手，阿輝坦言與對手差距大，「無論技術、速度、體能、甚至意識都差好遠，仲要去到國家隊層面，每一個球員可以代表國家隊出賽係一個榮譽，變咗比亞冠比賽更難踢。」8日3賽，體能需求更大，「三場比賽頻率同對抗性都好唔同，香港球員出到去，特別係對強隊時，體能係會輸蝕啲。」

十年人事幾番新，阿輝的第一次，教練是金判坤，帶領港足再取東錦賽入場券的是加利韋特，即將領軍再戰東錦賽的，是麥柏倫，中間還有過客摩力克。阿輝指麥柏倫與其他教練最不同之處，是賽前針對性部署最詳盡。球員與10年那屆相比就有更大分別，只餘下阿輝一人仍在陣，「10年前得卓卓一個入籍兵，家陣可能正選都四至五個。自己就希望可以多啲年輕球員上陣，見到鄭兆均、徐宏傑同羅梓駿呢啲都好有潛質，希望可以多啲上陣。」人以外，變的還有事物，「同當年比，代表隊配套專業咗好多，教練團隊，或者訓練設施等等都比以前專業。」由0到77，阿輝也改變了，「自己嘅轉變？我諗係脾氣同心態上，以前喺球場好火，好易乜都表露出嚟，家陣識收放。」由小將變成老大哥，葉鴻輝場內場外，也要兼顧帶領隊友的責任。

再戰東錦賽，阿輝坦言沒有壓力，「始終晉咗級，達成目標，睇教練想畀年輕球員機會，定準備世盃外。」當然，上場就會盡力。不過，遇上宿敵中國，壓力會更大嗎？「唔會單單睇某一隊去踢，每場都會全力以赴。球迷可能會有運動以外因素去定性一場比賽，但球員就會好專業，做番球場上嘅嘢。」

專注在場上，那麼，想藉這個關注度大的高水平賽事爭取外流嗎？「外流一直係夢想，但隨年紀增長，機會漸減。」葉鴻輝這個90後，不經不覺，來年就會踏入「三字頭」，他續說：「先做好自己，近年表現都唔算好，我成日覺得做好自己機會就會嚟，唔做好，機會嚟到都把握唔到。」

葉鴻輝小檔案
出生日期：21/03/90（29歲）
身高：1米80
位置：門將
曾效球會：華家堡、天水圍飛馬、南華
現效球會：東方
主要榮譽：東亞運足球賽金牌（1次）、港甲（頂級聯賽）冠軍（1次）、港超聯冠軍（1次）、香港足球先生（1次）、 香港足球明星（8次）

記者：禤家民
攝影：王子俊

--------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
--------------------
【撐學生】召集有心人 撐學生全年睇《蘋果》
立即按此
--------------------
《體蘋果》陪你睇波講波
https://www.fb.com/appledailysports