特首梁振英今朝去立法會宣讀施政報告，全體官員按慣例都要出席撐一撐。早到咗有咩好做？通常都喺議事廳內周圍走吹吹水。

八方現場所見，幾個局長包括政制及內地事務局局長譚志源、保安局局長黎楝國、財經事務及庫務局局長陳家強，不停有議員圍埋同佢哋傾偈；近期為「網絡23條」打緊仗嘅商務及經濟發展局局長蘇錦樑，亦有唔少議員同佢打牙骹，唔知係咪交流反拉布心得？政務司司長林鄭月娥一來到，亦吹埋一份。啱啱傷癒好返嘅食物及衛生局局長高永文亦好受歡迎，民建聯葛珮帆等都上前慰問。

咦，點解當中有人孤伶伶坐埋一邊？咁鬼獨家村，睇真啲，原來係教育局局長吳克儉。噢，可能其他人冇佢咁博覽群書，唔敢上前開口露底咯。