當年今日
關於我們

【我墮入情網】羅莽憶亡妻讚偉大 撻着細20年女友譜父女戀

蘋果日報 2019/09/10 06:01

血癌亡妻父女戀羅莽

67歲羅莽最近因跟細20年的女友戀情曝光,勾起大眾對他的深刻印象,外表硬橋硬馬的羅師傅,曾有一段婚姻,但妻子於30年前不幸病逝,羅師傅獨力湊大一子一女。
「我25歲結婚,同太太係緣份,我係喺邵氏最光輝日子結婚,邵氏末落之後冇戲開,因為冇片拍冇收入,我跟爸爸做三行,有時去內地,我好少喺屋企,太太照顧一子一女非常之好,當我返番去搵佢,我買咗隻金勞送畀佢,佢好開心,有次我哋行街,佢買咗一隻碟《無言的結局》,佢話首歌好聽。」提到亡妻病逝原因,羅師傅嘆說:「佢有血癌,人好講運氣,而家咁昌明社會都有醫生斷錯症,我哋屋企喺城寨時,成家都係睇呢個醫生,佢好犀利,爸爸病到幾乎斷氣、我後生胃痛得好緊要,打兩針就醫好,呢個係我哋家庭醫生。」
有天,太太的大髀突然有一撻撻瘀,羅師傅帶她去看這位家庭醫生:「唔知係咪真係年紀大咗,佢話係傷風感冒,冇事嘅,但拖咗成兩三個禮拜都未好,太太好辛苦,我帶佢去伊利沙伯睇街症,一睇check到原來一撻撻係血癌,醫生問點解咁遲嚟?已經末期!我哋知道情況後,佢接受治療,頭髮光晒,佢每次見到我都話冇事,有次醫生話有隻新發明嘅藥,呢隻藥五五波,但食咗好辛苦,叫我哋有心理準備。」
羅師傅跟太太商量後,同意試新藥,「有晚佢打畀我,叫我去醫院睇佢,佢見到我好開心,話畀我聽冇事嘞,醫生話食咗嗰隻藥產生效果,完全OK,叫我唔使擔心,我同媽媽都好開心,轉頭佢話休息,幾日冇瞓覺,而家瞓覺;醫生畀隻安眠藥我,叫我攞畀佢食,咁我攞畀佢,佢一啖吞咗,我以為佢瞓覺就走咗,到兩三點收到通知,佢唔想我哋睇到佢咁辛苦,就離開咗!」
亡妻對他情深義重,羅師傅說:「所以我覺得太太有偉大精神,唔想我哋擔心佢,因為醫唔到佢,費事我哋辛苦,佢就呃我哋,食安眠藥瞓覺,我以為佢冇事,點知佢食咗落去就斷氣。我太太係非常之偉大,唔想我哋驚,所以之後我教仔女教得佢哋好好,我個女想讀書,我供佢去澳洲讀到碩士,佢而家嫁咗懲教署嘅官唔做嘢,最緊要佢鍾意啦,哈哈!我個仔讀書麻麻地,我同佢講嘥錢冇所謂,唔好嘥自己時間,結果佢去考消防,而家做咗消防教官。」
8年前,羅師傅認識了現任女友Vievem,對方比他細20年,羅師傅低調說:「求其搵個人陪下就算,男女之間合就喺埋一齊,多謝傳媒咁關心,但問得多係一種壓力,希望大家唔好畀咁多壓力我。」問會否介意被指是父女戀?羅師傅說:「唔緊要,現今社會好開放,我唔覺得乜嘢一回事,年齡唔係大問題。」
撰文:余燕儀
攝影:陳俊強
攝錄:廖達燊
場地:The AIR (The ONE)
-----------------------------
【撐學生】
召集有心人 撐學生全年睇《蘋果》
立即按此
empty
羅師傅喪妻30年,89年太太因血癌離世。
empty
羅師傅獨自湊大一對子女。
empty
羅師傅大讚亡妻好偉大。
empty
羅師傅平日鍾意行山 (受訪者提供圖片)
empty
和大陸女友拍拖8年 (受訪者提供圖片)
empty
羅師傅不介意被指父女戀,希望低調戀情。