告東尼平安夜生日又大咗一歲，呢日佢先於第九場贏「幸運勝利」，拎到份遲來之生日禮物。最終好事成雙，尾場二班1400米贏埋「萬事勇」起孖變厚禮，如果唔係第十場「幸運日」影相飲恨，佢甚至可以包辦埋三寶。
「萬事勇」上仗三班同程用李富孭頂磅，放到返嚟輸少少畀「日威夜威」屈居亞軍，呢次跑高一班不特止，仲要換埋吳嘉晉減五磅，負111磅輕上加輕，結果二檔起步順勢埋欄，就此一放迄終，以輕鬆姿態補中，兼幫「萬事」系馬打破今季齋缽，獨贏有5.5倍，賽後馬主張祖昌太太伍燕梅好high，攬住「牛精叻仔」馬主王永強慶祝。
至於今場二、三名檔位極端，1檔之天價自購馬「魔法豪情」入Q，14檔之「福毅」後上跑第三，兩駒分別保持今季全入Q及服役全上名，而2014年最後一場賽事結果由三大熱門包辦前三名，可算皆大歡喜。
伍燕梅說:「『萬事勇』今場贏在輕磅，加上牠以往於此程曾跑出快時間，今場交回應有水準，遂順利取勝，希望牠加分後繼續進步。」