早前一班前高官同前議員，包括前政務司司長陳方安生、前保安司黎慶寧、前憲制事務司施祖祥、前經濟司布簡瓊等等發起聯署，力促特首林鄭月娥撤回《逃犯條例》修例，同時呼籲所有問責官員及行會成員向特首進諫，其中有份聯署嘅包括身兼前港區人大代表嘅朱幼麟。飛天朱喺林鄭最終只願暫緩而未有撤回惡法之際身在海外，但仍然心繫香港，早前投稿網媒鬧修例倉卒，施政離地，行會冇發揮到協助特首掌握民情嘅角色，向來都係槍械專家嘅佢亦大鬧警方用橡膠子彈時嘅打法（平打）係錯嘅，「有危險的，可以打死人的」。

向來都幾有大膽創新想法嘅飛天朱，近日忽發奇想，同八方明言：「取消禮賓府作為特首住所！」。點解唔俾娥特住禮賓府？飛天朱話喎，呢次修訂風波佢睇到嘅係可能係：「小丫頭，住禮賓府，住昏了頭腦，以為自己是皇太后」。佢話呀，禮賓府顧名思義就係用嚟招待人啦，唔係叫「港督府、特首府」喎，覺得中央官員來港後，仲要去呢個住所見特首，更加係非常不適合，認為下屆政府一定要改。點改好？「一半時間開放給市民，一半時間給特首政府用，像人民大會堂一樣！」唔……似乎都係睇埋下屆邊個做特首先得嘞。

-----------------------------
【登記做選民 7月2日截止】

登記方法：
。親身取表填寫及郵遞
。網上登記（可用手機登入，在選舉事務處網頁打開REO-1表格，使用免費手機應用程式Adobe Fill & Sign打開表格，再按指示填寫資料，按儲存文件並以點擊分享，再電郵至 [email protected]）

詳情可參閱選舉事務處網頁：
https://www.reo.gov.hk/ch/voter/gcnr.htm
-----------------------------
你撐蘋果 我捐$1
支援反送中抗爭者