港股由低位反彈750多點（22123到22880）後，昨日回一回氣，但承接力頗強，最低潮時亦只下跌142點，午後回升，收市僅跌32點，成交亦大為縮減，只有685億元。大市回升到10日線（22854）水平，略作調整，消化一下低位的獲利貨，後市發展可更為健康。
勵晶太平洋（575）盈利大增，宣佈業績後，股價反而大跌，公司發盈「喜」，股東反而「悲」。本月15日推介勵晶，當時股價0.43元，正好係突破歷時4個月的徘徊區頂部阻力之際，但公司就宣佈單方面終止收購澳洲上市鐵礦石公司BCIron，發展形勢有變，勵晶股價當日低開後就大幅滑落，且跌勢不止，昨日更低收0.33元，再大跌10.8%。其實，講心嗰句，公司宣佈得都算合時，否則升多兩三日後先講，就真係死得人多。

勵晶去年盤數其實唔錯，股東應佔溢利5980萬美元，大升4.38倍，好過市場預期，股價不升反而大跌，問題就出在終止收購BCIron方面，對公司發展可能帶來重大影響。不過，勵晶係投資高手，唔做東可以做西，日後一樣可透過增值收購及投資機遇尋求增長，何況公司資產厚，2010年底每股NAV成0.54元，股價跌得太殘，反可以一博。
呻完，講番啲開心嘢。上周五推介嘅環球乳業（1007），昨日就衝破3元大關，收3.06元，升0.19元，升幅6.6%，比推介價2.73元升咗12%，日本食物鏈受輻射污染問題日趨嚴重，內地奶粉需求勢必上升，環球乳業往績PE只7.7倍，處偏低水平，中線仍可看好。
福邦控股（1041）升吓升吓已經上到2.5仙，上月11日推介後，在2仙同2.1仙大把機會低吸，現時升幅已接近兩成。
前日，福邦有大場面，連續多宗大手成交，涉及25億股，噚日收到料，原來係有內地猛人入股，主要係睇中福邦轉型電動巴士業務，未來發展潛力極大，看來公司將會有連串大動作，而股價亦有機會上衝3字頭。
郭兆誠