社交網站facebook嘅群組「爭取引進草泥馬（羊駝）成為香港海洋公園一分子」，參加人數突破2,000大關，發起人莫乃光於是順應網民要求，去信海洋公園，希望園方引入呢隻網絡神獸之首。但園方已經正式回覆，話唔會考慮，令一眾網民空歡喜一場。
海洋公園好重視呢單嘢，前日禮拜日，仍然由遊客服務部發電郵回覆莫乃光，首先稱讚引入羊駝呢個建議「非常獨特」，但筆鋒一轉，話園方2006至2012發展計劃冇包括引入呢樣動物，所以唔會考慮。海洋公園又話，未來園內景點會由35個增至70個，除咗「死過翻生」嘅中華鱘會回歸之外，年底落成嘅水族館會養超過400種魚。園方聲稱要集中資源投放迎接計劃中嘅新動物，確保佢哋得到完善專業照顧。
莫乃光同八方講，內地好多動物園都有養羊駝，唔明點解香港唔養得，覺得海洋公園個答覆好行貨，「都冇解釋草泥馬係咪好難養。淨係話冇考慮過就唔接受建議，咁佢哋唔使聽意見o架啦。」佢又話，早幾日已經去信海洋公園主席盛智文，早唔覆遲唔覆，等《蘋果》前日報道咗就即刻覆，擺明係公關手段，「估唔到海洋公園禮拜日都會覆信，真係勤力。」

網民失望　提議畀時間表

網民知道海洋公園拒絕收留草泥馬之後，都好失望。有人提議海洋公園承諾畀個時間表，爭取納入2012年後發展計劃，又可以試吓問問新界農莊肯唔肯收留。有啲人就話，草泥馬多數喺南半球高原，唔知適唔適應香港氣候，「可能要開番個人工溫室名曰馬勒戈壁（普通話粗口諧音、草泥馬發源地）先得，呢個講緊都唔少錢o架。」
相傳內地河蟹橫行，同草泥馬惡鬥多年未分勝負，另一神獸、「搜索隱禽」古鴿（谷歌的普通話諧音）就冇咁頑強，今年大舉遷徙來港，絕迹內地。從此草泥馬要翻牆先可以同古鴿相聚，聞者心酸。八方建議政府資助海洋公園，搞番個網絡生態館，養齊草泥馬、河蟹同埋古鴿，肯定吸引大中華網民爭相朝聖，好過去所羅門群島買野生海豚俾人狂鬧。

mailto:[email protected]