金管局前總裁任志剛去年10月退休，退休宣言言猶在耳，噚日就公佈加盟中大，擔任工商管理學院名譽教授，同埋喺中大新成立嘅全球經濟及金融研究所出任「傑出研究員」。任總以前年薪1,200萬，家陣隨時係全球最高人工研究員，佢唔肯透露做研究員收幾錢，話到中大教書同研究講心，笑言好彩當年喺金管局打工待遇唔錯，家陣唔需要再為錢工作咯。
任總透露退休後一直有私人機構搵佢出山，佢多數婉拒，加入研究所都唔係全職工作，事關做中國金融學會副會長，要留啲時間「報國」。以前出入中環，家去到馬料水，任總大讚環境清幽，到處翠綠鳥語花香，唔使再時刻開住電視睇直播即時新聞「咁前衞」，有機會踎喺中大享受清靜環境，好正咁話，唔似得以前喺國金88樓咁，無疑係大地在我腳下，國計掌於手中，回想國金外望境況，窗外都不過係一嚿雲。

教Money&Banking

正所謂民望於我如浮雲，由雲端下來踎在中大，任總係看破紅塵，還是另有深意，八方不敢亂說，但既然佢享受鳥語花香，相信學hea已有小成。中大校長劉遵義指任總在位16年，係貨幣同金融市場專家，幫香港打大鱷，所以羅致佢向中大學生授課。據悉任總會教Money&Banking。
全球經濟及金融研究所會開辦為期一至兩星期嘅行政人員課程，每班20至60人，對象係內地、香港、海外嘅銀行、保險、經紀業界高級專業人士同埋行政人員，政府或監管機構人員參與無任歡迎，任總話好樂意同大家分享金融海嘯嘅個案。
呢啲高級打工仔學生日理萬機，可能要周末上課，中大可安排住宿舍，學費方面，有任總做生招牌，平極有限，好彩任總話會錫住大家荷包，「希望同學會承受到嘅價格」。既然講嘢有價，任總唔立亂開金口，八方噚日問佢對最新經濟形勢看法，佢強調「不在其位，不謀其政」唔適宜講咁多。

mailto:[email protected]