今晚（15日）跑馬地馬場條C跑道好利內檔馬，馬會公佈，將按計劃在第四場後進行壓地，上半場內檔咁着數，下半場又壓地，場地情況保持良好，預期內檔會繼續有利。
睇番跑完上半場第一至四場賽事，無論中距離或短途，排內檔跟前守好位馬佔到優勢，好似第二場「威震天」及「君悅灣」分別靠內檔慳晒位下包Ｑ；第四場「英姿茂盛」憑一檔開齋。反而外檔馬早段未能切入的話，都好難反敗為勝，好似頭場「辣辣椒」排外檔焗留前鬥後下，因場地偏差只追入一席冇威脅的第三，後追馬較吃虧。除非像第三場排11檔的「琪麟穎」般，中段踩油發力率先透出，藉跑道利擺前走的偏差帶到贏馬。
另外，文家良連場有冷馬走入三甲，下半場第五至八場仍有不少邊線馬，其中第五場「勇少爺」及第八場「小島怡情」守到好位的話，不難交出佳績。