「當年我沒攔住你，如今你也攔不住我！」封面上幾隻滑鼠列隊前行，呢個畫面點解咁熟口熟面嘅？但企喺前面嘅唔係20年前嘅王維林，而係試圖螳臂當車嘅「綠壩」符號。呢幅令八方想起1989年經典一幕嘅作品，由內地博客張發財原創，家做咗新書《中國猛博》嘅封面，真係好鬼貼切。

來港出席新書發佈會

當年人民雖然擋不住坦克，但今日綠壩也擋不住內地上億嘅網民同博客，網絡已經成為國家機器難以完全壓制嘅言論空間。《中國猛博》收錄咗17個內地著名博客嘅故事，講佢哋點樣透過網絡力量，參與同影響公共事件，好似因為廈門PX事件成為網絡英雄嘅連岳、用漫畫寫博客嘅李小乖等等。噚日喺香港舉行嘅新書發佈會，邀請咗其中幾位內地博客出席，當中除咗冉（粵音：染）雲飛喺成都機場出發時被公安截住，其他人都成功抵港。
本書嘅主編係港大新聞及傳媒研究中心陳婉瑩教授同錢鋼。錢鋼話，對於冉雲飛嚟唔到，好可惜好遺憾，但就引用冉雲飛嘅網誌格言「日拱一卒，不期速成」互勉，即係慢慢來，始終會見到成果。編著嘅翟明磊亦係博客，佢話今次採訪，令佢印象深刻。
好似80後嘅韓寒，曾經因為撰文批評盲目民族主義被糞青網民圍攻，但佢都用微笑應對挑釁。網民話：「祖國就是你的母親。」韓寒答：「祖國是祖國，母親是母親。」對方再話：「你怎麼對得起你腳下自己的土地？」韓寒就話：「我沒有自己的土地，你也沒有自己的土地。」翟明磊採訪完韓寒之後，即刻諗起梁啟超嘅「少年獨立則國獨立」，令佢覺得中國仲有希望。

送奶粉營救胡佳B女

又好似胡佳太太曾金燕，老公被公安拉咗，佢被迫要用博客求救。最搞嘢係佢屋企日夜被人守住，啲守衞仲唔畀奶粉入屋，咁個BB女食乜呢？網民睇到，即刻搞咗個送奶粉競賽，其中有個博客最醒，首先下載Google衞星圖，摸清曾金燕屋企四周環境，潛入屋苑之後，匿喺鍋爐房抱住個鍋爐過咗晚，第二朝扮成跑步嘅居民跑到曾金燕樓下，用相機紅外線射去胡家個窗度，通知曾金燕阿媽落街接奶粉。
有時候，對付強權，要有創意同幽默。
mailto:[email protected]