51歲嘅郭富城喺今年4月同大陸女模方媛（Moka）結婚成為人夫，而佢喺日前仲宣佈榮升爸爸喺微博貼一家三口勾手指相，仲留言話：「開心、微妙、感恩！我們仨！成長、家庭、守護！ ​​​」

當時城城經理人小美回應《蘋果》時仲話多謝大家祝福同關心，仲話安頓好家人，要返劇組拍攝電影咁話。今日呢位新手爸爸會出席活動，佢就話好多謝電影公司咁話。

城城接受《蘋果》Live訪問時表示：「過去幾個星期好電影公司都好體諒我，令我有多啲時陪屋企人，又可以拍其他嘢先，多謝子光、好多謝電影公司，所以呢段時間已經返去拍戲，呢段時間其實要安頓屋企細節，已經打點好晒，自己心安落晒就返去拍戲。」城城表示B女仍未改名，佢話：「希望跟番長輩、媽媽嗰邊幫佢諗名，o依家家都係叫佢BB（高八度）。」問到佢試過餵奶換尿片？城城坦言：「我唔係好夠膽，但抱就有，好似一個mini版城城，好得意，好幸福好開心，始終一個家庭，一個成長過程，好多朋友睇住我成長，人生改變咗好多，以往同朋友出去食飯，o依家好少，收工都係返屋企。」

佢仲透露囡囡出世時6磅重，由佢自己剪臍帶，佢仲話當時好緊張，手都震埋，仲會日日幫佢影相，如果佢做嘢就叫太太幫手影。問到佢工作係咪好唔捨得囡囡？佢話：「唔捨得一定會，但當我拍戲好專注，收工可以視訊。百日宴就未，最快滿月一家人食飯，係好幸福事。」

《蘋果》Facebook Live重溫:
https://www.facebook.com/hk.nextmedia/?fref=ts