一年一度嘅港姐噚晚已經選出，冠軍雷莊𠒇，2017年大台選港姐棄用全民投票，「還原基本步」，只係由8位評判投票，決定賽果(新聞連結： http://bit.ly/2wB38II )。

不過網民對今年嘅評分制度惹來好大爭議，「校長」鄭裕玲(嘟姐)一人可以投兩票，唔少網民都話「嘟姐你玩晒」，指雷莊𠒇似《食神》莫文蔚定《踩過界》蔡思貝？又傳雷莊𠒇家族猛料(新聞連結： http://bit.ly/2gF8Cy6 )。

就噚晚港姐選美，通訊事務管理局今日共接獲20宗投訴，主要投訴內容係賽果不公、黑箱作業、有誤導觀眾及有植入式廣告之嫌。

鄭裕玲噚晚投出關鍵嘅兩票，今日喺商台節目《口水多過浪花》中解咗畫，話自己係憑良心投畀5號，絕對冇造馬成份（新聞連結： http://bit.ly/2eUwWby ）。

至於港姐統籌總經理余詠珊今日回應傳媒時就話過去3年都係全民投票，由於去年投票冇咁踴躍，所以今年用大會評審委員去決定。余詠珊又讚雷莊𠒇表現好好，分數亦係最高。

即係…唔係冇俾你哋投呀，而係網民唔珍惜去投咋。唔係吓話…