廖啟智、陳秀雯、岑珈其、劉俊謙、黃澤鋒等今日為劇集《教束》舉行記者會，活動中，飾演校長的智叔指最難忘被學生圍的戲，他說：「最震撼嗰場戲係我揸車返學，然後被學生圍，佢哋湧埋嚟，其實有啲驚，仲要被矮小嘅人，但心智似乎超越中學生，咁先震撼吖嘛，嗰場戲係有啲怯。」

智叔表示與秀雯相隔3年再度合作，希望觀眾看到他們的默契。對於這套劇很貼地，智叔說：「直情係現今社會嘅反映。」提到智叔所講的最震撼的一場戲，他說：「原來小朋友會扮到大人咁樣嘅行動，係會心驚，有意見唔緊要，但唔好圍我吖嘛，呢個行動可唔可以收斂少少呢？」講到這類場面，近年在新聞上經常看到，例如特首被圍，智叔即說：「我唔係特首嚟㗎！」秀雯則說：「喺新聞上都見過，同我哋細個讀書好唔一樣。」

問到他們在劇中是否對立？智叔表示大家理念不同。秀雯說：「好難講邊個啱邊個唔啱，例如將資源放喺資優學生身上，咁係值得培養，但唔係好資優嘅學生冇人理，咁又好唔公平。」智叔即說：「呢個世界講到尾都係講錢。」

現時辦學猶如做生意，秀雯表示：「我識一啲家長，佢哋『騰雞』得好緊要，壓力大得好緊要，要陪小朋友學好多嘢，點解要咁呢？我好唔明。」智叔接着說：「人最慘就係有比較，怕被人比低。」秀雯指自己不是怪獸家長，只要小朋友有某方面的天份，才會培育他。

此外，秀雯已有數年沒有拍劇，今次再拍劇，她笑言畢業後第一份工作就是做演員，所以幾時拍，感覺都是一樣，「今次劇組全部係年青班底，要重新適應新嘅工作方式，但我好熱血嘅！」

--------------------------------
【新聞有價】6月17日起 繼續撐蘋果
https://hk.adai.ly/GTPgDi0woX
--------------------------------
【記住63836568】全民爆相爆片！下一個爆料王就係你
https://bit.ly/2Guolu9