【新增動新聞】
特首林鄭月娥夢想和理非同勇武割席，偏偏呢一日無來臨，反而林鄭夫君林兆波似乎經已同林鄭割咗席。由內地官媒《人民日報》發放嘅影片所見，噚晚林鄭喺澳門出席文藝演出嘅時候，同現場無數嘅嘉賓、出席者融為一體，一邊唱《歌唱祖國》一邊拍手打拍子，但係林鄭身邊嘅林兆波就好似射罰球咁佇立喺度。

自從半日前《人民日報》喺Facebook出咗一條叫做「祝福祖國！祝福澳門！習近平在澳門文藝演出現場，同全場一起高唱《歌唱祖國》」嘅短片之後，唔少網民都議論紛紛，講緊嘅當然係林生。

條片一開始就嚟個大wide shot，《歌唱祖國》嘅音樂徐徐響起，成堆人準備唱歌，然後當然係大頭影住中國國家主席習近平開始唱歌兼打拍子，跟住唔同人物出現，例如澳門前特首崔世安、新特首賀一誠、習近平夫人彭麗媛等，啲人係唔同咗，但動作完全一樣，把口唱住《歌唱祖國》，對手就打拍子。

不過去到影片第45秒左右，見到外交部部長王毅、港澳辦主任張曉明，仲有林鄭都係同其他人一樣唱歌、打拍子嘅同時，畫面左邊着藍色西裝、打藍色呔嘅林兆波就相當突出咁，雙手放前、嘴唇微張、不動如山。

唔少連登仔都大讚林生呢次勇武行為，令林生贏得「手足」嘅稱號。無可否認，林生呢次深入敵陣嘅舉動令人刮目相看，須知道林生係同林鄭一樣企喺前線，所以佢係名副其實嘅前線手足。

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
無懼警暴 學懂自救
《抗暴之戰●法例須知》讀果 上架
-----------------------------
【撐學生】
召集有心人 撐學生全年睇《蘋果》
立即按此