由孔劉、馬東石、鄭有美等人主演嘅韓國賣座喪屍電影《屍殺列車》，前年上映時席捲亞洲，早前導演延尚昊更宣佈開拍《屍殺列車》嘅續集《半島》，以《屍殺列車》為背景，講述喪屍病毒傳播至「病毒安全區」釜山嘅故事。

日前導演延尚昊演出節目時，跟一眾主持回顧《屍殺列車》嘅電影片段，除公開更多幕後花絮外，導演更於電影上映兩年後先驚覺當中有穿崩位。

於《屍殺列車》中，其中一幕係孔劉抱住囡囡逃走時，鏡頭影到地板上嘅黃色標誌，導演都係於節目中跟大家一齊重溫電影片段時先首次發現，表示該標誌係演員逃走必須企定嘅位置，而電影上映後竟一直冇人發現。

另外，導演延尚昊再度證實《半島》係《屍殺列車》嘅續集，不過佢亦坦言有啲擔心：「其實要挑戰賣座片嘅續集，我有啲害怕，代表（新片）一定要大賣。」

更多韓流，喺晒《娛果》
http://fb.com/appledailyent