德甲今晚煞科，點都要捧吓場，其中下半季走晒樣嘅賀芬咸，季尾先至回復正常，作客換帥後虎頭蛇尾嘅史浩克04，就追佢哋開2:2波膽。
賀芬咸呢支升班馬今季好神奇，上半季勁到暈，仲攞番個冬季冠軍，但下半季屎到爆，仲試過喺聯賽連續12場不勝，排名一級一級咁跌，連EuropaLeague個位都保唔住。去到季尾佢哋先至返正軌，對上3場聯賽取得2勝1和，其中上場仲搞破壞，2:2摸和拜仁慕尼黑，令對方現時兩分落後「1哥」禾夫斯堡。
史浩克喺3月尾炒咗魯頓改以布堅斯等3名助教組成臨時教練團統領球隊後，一口氣連贏4場，但對上4場1和3負，加上連之前有表現嘅古蘭爾亦突然冇晒，對住回勇嘅賀芬咸真係冇權贏波。就博兩隊打和，並開11倍嘅2:2波膽。

天鵝攻強吼「主其他」

同日卡爾斯魯厄主場對哈化柏林，前者爭德甲留級附加賽席位，後者就爭下季歐聯位，所以兩隊都肯定搏命。主隊卡爾斯魯厄上場爆大冷作客贏雲達不來梅3:1，信心大增，加上中場史甸度「弗」，有權半場領先，但基於哈化質素始終較好，就冷敲[主/客]，賠率有成22倍㗎。
至於日聯新潟天鵝主場對清水心跳，主隊嘅攻擊鐵三角柏度祖尼亞、矢野貴章同埋大島秀夫表現對辦，聯賽共入13球，不過防守就唔係好掂，加上對手攻力有番咁上下，就博主隊開「主其他」波膽。文︰青蛙仔