玩具大王蔡志明囝囝蔡加讚舊年11月同汪圓圓結婚，之後火速造人成功，今日加讚媽咪蔡李惠莉喺太子出席保良局「點滴創明天」慈善嘉年華，同場仲有何鴻燊四太梁安琪、歌手杜德偉、洪卓立同埋SuperGirls等。

講到新抱仔圓圓已經懷孕，蔡太堅持唔肯講幾多個月：「啱啱有咗冇耐，會年底生。」問佢係咪已經有咗三個月？佢話：「差唔多啦。」

蔡太話圓圓依家有時食嘢都會嘔，食正常吸收嘅食物，依家未食得補品住。咁囝囝加讚係咪好開心呢？佢話：「係，依家會盡量抽時間陪佢。」蔡太話依家圓圓兩公婆仲同佢哋一齊住，新居嗰邊裝修緊，佢話應該會喺香港生，但未決定係咪開刀。

問蔡太有咩奬勵下新抱？佢即笑道：「我成個乖仔都奬咗畀佢!」

蔡太話加讚兩公婆對生小朋友都係抱住順其自然嘅心態，不過兩人都好鍾意小朋友，依家佢哋好開心、好甜蜜，期待佢哋嘅BB出世。問蔡太想男孫定女孫？佢話冇所謂，仲話諗緊整個兒童樂園喺屋企俾孫玩。至於BB名字，加讚兩公婆都仲諗緊，未決定。係咪會鼓勵圓圓唔只生一個？蔡太話:「應該都唔只!」咁咪好似千億新抱徐子淇咁？