正日係14日生日嘅志偉，相識滿天下，一日點夠慶祝呢？6號嗰晚同同樣牛一嘅彭健新、以及14號生日嘅黃杏秀搞咗個生日party，出席嘅有鐵腳叻哥陳百祥同譚詠麟，仲有許冠文。阿倫噚日朝仲喺微博上載相片，當時見志偉high到企上張凳上唱歌影相，而健仔就負責彈結他，咁唔知當晚志偉有冇醉到又被抬走呢？

答案係…有。就連俾人將花呀、酒樽呀擺晒落個身度，腳趾公攝住個酒塞，總之搞到成身都係嘢，志偉都渾然不覺。最重要係，「搞」佢嘅，都係女呀﹗咁好艷福，志偉竟然冧咗！阿倫還寫道： 「皇帝生日真係有好多貢品，志偉呢幾晩都係咁過！」