【李八方online】習大大訪港「觀光」點 有乜政治含意?
李八方林鄭登基習總訪港
習近平此行訪港,視察嘅景點都悉心安排,尤其要凸顯對林鄭嘅支持。蘋果日報
升呢做國家主席後,習近平周四首度來港,除咗出席回歸20週年活動同主持宣誓儀式,仲會落區視察不同基建,據知佢呢次「觀光」行程,全部都好有政治意思,尤其抵步後即將踏足西九文化區,藉住西九係林鄭專責主理嘅baby,凸顯對候任特首林鄭月娥嘅高度支持。
有知情人士話,喺西九拍板落實建故宮館前保密嘅要求,都係中方提出,最後特區政府搵到馬會贊助,以免要經正常程序攞撥款,拉布都拉到項目夭折。其實咁樣未經諮詢嘅安排,林鄭又點會唔聞火藥味?但佢獨力承擔,仲話過如果要諮詢而遇反對,中央會非常尷尬。
呢句話聽在港人耳裡一把火,中央卻還得神落,據知阿爺覺得冇揀錯人而好安樂。而呢種有擔當,正正係阿爺搵佢臨危授命代替梁振英上場選特首原因,而林鄭就算私下未必支持梁振英施政,但至少唔會公開唱反調,據聞呢點同曾俊華嘅分別,就係阿爺揀佢嘅關鍵,所以此行第一擊,送咗畀林鄭。
據聞習大大會視乎情況,順道去埋西九嘅高鐵站,若然真係踏足,旨在話畀市民聽中央支持此項目,尤其一地兩檢方案料七月出爐,係林鄭首個要推嘅大爭議項目,同樣都係為林鄭打氣嘅啫。
至於臨走前盛傳會視察嘅港珠澳大橋,就真係唔睇唔得咯, 2011年動工,歷經波折終於喺年底完工,通車在望,算係梁振英任內嘅政績,習大大又豈可不親臨支持?唔好忘記,條橋跨越粵、港、澳三地,可算中央嘅整體大project!
雖則習大大揀呢三大景點,旨在傳送政治訊息,但唔好忘記呢三個地方,各有「污點」。西九文化區嘅內涵軟件一直惹爭議,同高鐵工程都嚴重超友,港澳珠大橋仲爆出造假醜聞,查實習大大會唔會順道明查暗訪,睇下工程到底出現咗乜問題?
而講真吖,習大大喺邊度留低腳毛同政治符號,港人未必好關心,反而在更意,佢此行會落乜嘢聖旨?據聞港獨肯定係重點,而一國下先有兩制呢個論調有乜微言大義,屆時自有分曉!