肥彭抵港，噚晚搵老友敍舊，同前下屬陳方安生去灣仔留園雅敍食飯，嗰處上海菜出名，肥彭應該好滿意。兩人飯局後，肥彭離開時被問到對下任特首人選有乜意見，佢冇回答。
肥彭呢次嚟香港，唔係又出書，而係做為牛津大學出版社香港分社50周年嘉賓，推介全球首套完備幼兒英語學習系統OxfordPath牛津幼兒英語趣味故事，佢身兼牛津大學校監，幫牛津做「生招牌」好合理。肥彭今日會公開露面，包括主持英語故事環節（Storytelling），講古仔帶領過百個家長同幼兒進入牛津英語故事世界，又會做香港首家OxfordPath牛津幼兒英語天地剪綵。